BX : Миний аав

<[ORGIL_SH]>

Дөрвөн өдрийн дөрөө даах морьтой явсан
Дөчин бодын авцааг даах итгэлтэй явсан
Эр бор харцгынхаа шуранхайг хадаан давхихдаа
Миний аав ээжийн ариун зүрхэнд гал болон бадарч явсан

Аавын минь дуулсан дуу
Маргааш мандах наран юм аа
Аавын минь туулсан зам харгуй
Хотоор сүндэрлэсэн буян юм аа

Эрдмийг эрдэнэ болгон тайлах үйлстэй төрсөн
Элбэг ухаан уужуу сэтгэлийн жигүүртэй явсан
Ар хөвчийн унага шиг агсамхан хорвоог туулахдаа
Миний аав алаг хонгор үрсээ гал болон бадрааж өсгөсөн

Аавын минь зохиосон үлгэр
Зүрхэнд минь үүрд наран юм аа
Аавын минь зорьсон үйлс бүхэн
Хотол түмний минь жаргал юм аа

Хатуу зөөлөнд халширч гудайхгүй тэргүүн явсан
Хазгай тэгшийн заяанд гулзайхгүй нуруутай төрсөн
Цаг цагийн нарыг хийморь сүлдтэй туулахдаа
Миний аав цадиг түүхийн хуудсанд ариун үсгээр бичигдсэн

Аавын минь дулаахан өвөр
Мартахын аргагүй диваажин юм аа
Аавын минь захисан үг бүхэн
Сэтгэлд сийлэгдсэн зарлиг юм аа

WWW.ORGILSH.COM